ఫుల్ జోష్ లో నేచురల్ స్టార్ నాని… పూజా కార్యక్రమాలతో దసరా ప్రారంభం !

నేచురల్ స్టార్ నాని ప్రస్తుతం శ్యామ్ సింగరాయ్ సినిమా సక్సెస్ తో ఫుల్ జోష్ లో ఉన్నాడు. చాలా కాలం తర్వాత నాని సినిమా మంచి విజయాన్ని అందుకుంది. రాహుల్ దర్శకత్వంలో వచ్చిన శ్యామ్ సింగరాయ్ సినిమాలో రెండు విభిన్నమైన పాత్రలో నటించి ఆకట్టుకున్నాడు నాని. ఈ సినిమాలో సాయి పల్లవి, లేటెస్ట్ సెన్సేషన్ కృతి శెట్టి హీరోయిన్స్ గా అలరించారు. ఇక ఈ సినిమా తర్వాత నాని, కీర్తీ సురేష్ జంటగా నటిస్తున్న తాజా సినిమా ‘దసరా’. ఈ మూవీకి శ్రీకాంత్ ఓదెల దర్శకత్వం వహిస్తుండగా… శ్రీ లక్ష్మీ వెంకటేశ్వర సినిమాస్ (ఎస్ఎల్‌వీసీ) పతాకంపై సుధాకర్ చెరుకూరి నిర్మిస్తున్నారు.

ఈ రోజు పూజా కార్యక్రమాలతో సినిమా మొదలైంది. మార్చి నుంచి రెగ్యులర్ షూటింగ్ స్టార్ట్ చేయనున్నారు. ప్రముఖ దర్శకుడు సుకుమార్, ‘ఆడవాళ్ళు మీకు జోహార్లు’ దర్శకుడు తిరుమల కిషోర్ పూజా కార్యక్రమాల్లో పాల్గొన్నారు. పక్కా తెలంగాణ భాష, యాసలతో… గోదావరిఖని బొగ్గు గనుల నేపథ్యంలో ‘దసరా’ రూపొందుతోంది. గత ఏడాది దసరా సందర్భంగా సినిమా గ్లింప్స్‌ విడుదల చేశారు. సముద్రఖని, సాయి కుమార్, జరినా వాహబ్ ముఖ్య పాత్రల్లో కనిపించనున్న ఈ చిత్రానికి సంతోష్ నారాయణన్ సంగీత దర్శకుడు.

సత్యన్ సూర్యన్ సినిమాటోగ్రఫర్‌, నవీన్ నూలి ఎడిటర్‌. ఇంకా ఈ చిత్రానికి అవినాష్ కొల్లా ప్రొడక్షన్ డిజైనర్, విజయ్ చాగంటి ఎగ్జిక్యూటివ్ నిర్మాత. ఇదిలా ఉంటే ఈ సినిమా ఓ కీలక పాత్ర కోసం మలయాళ కుర్ర హీరోను తీసుకున్నారని తెలుస్తుంది. మలయాళ యువనటుడు రోషన్ మాథ్యూ ఇందులో కీలక పాత్రను పోషించనున్నారు. ఈసినిమాలో రోహన్ నాని స్నేహితుడిగా కనిపించనున్నాడని తెలుస్తుంది. అలాగే ఈ సినిమాలో నాని నెగిటివ్ షేడ్స్ ఉన్న పాత్రలో ఆకట్టుకోనున్నాడట. కాగా ఈ కార్యక్రమానికి సంబంధించిన ఫోటోలు ప్రస్తుతం వైరల్ గా మారాయి.