RRR: ‘ఎత్తర జెండా’ ఫుల్ సాంగ్ వచ్చేసిందోచ్..!

మెగా పవర్ స్టార్ రామ్ చరణ్, యంగ్ టైగర్ ఎన్టీఆర్ మల్టీస్టారర్లుగా తెరకెక్కిన చిత్రం ‘ఆర్‌ఆర్‌ఆర్‌’. రాజమౌళి దర్శకత్వం రూపొందిన ఈ చిత్రం​ బాక్సాఫీస్‌ రికార్డులను తిరగరాసింది. భారీ అంచనాల మధ్య విడుదలైన ఈ సినిమా.. 11 వందల​కు పైగా వసూళ్లను సాధించి తెలుగు సినిమా ఖ్యాతిని మరోసారి పెంచింది. ఈ మూవీ విడుదలై నెల దాటింది. ఈ క్రమంలో కొద్ది రోజుల నుంచి ఈ మూవీలోని ఫుల్‌ సాంగ్స్‌ను ఒక్కొక్కొటిగా విడుదల చేస్తూ వస్తోంది చిత్ర యూనిట్‌.

ఇప్పటికే ‘నాటు నాటు’, ‘కొమ్మా ఉయ్యాలా’, ‘దోస్తీ’ వీడియోలు పంచుకున్న టీమ్‌ తాజాగా సెలబ్రేషన్‌ ఆంథమ్‌ ‘ఎత్తర జెండా’ను అందించింది.  ‘నెత్తురు మరిగితే ఎత్తరా జెండా’ అంటూ సాగే ఈ పాట థియేటర్లలో ప్రేక్షకులను బాగా ఆకట్టుకుంది. ఈ పాటను విశాల్ మిశ్రా, పృథ్వీ చంద్ర, ఎంఎం కీరవాణి, సాహితి చాగంతి, హారిక నారాయణ్ కలిసి పాడారు. ఈ సాంగ్‌లో ఎన్టీఆర్, రామ్ చరణ్‌ల డాన్స్ ఓ రేంజ్‌లో ఉంటుంది. ఎండ్ టైటిల్స్‌లో ఈ సాంగ్ వస్తుంది. సినిమా విడుదలకు ముందే ఈ పాటకు సంబంధించిన వీడియోను రిలీజ్‌ చేసినా అందులో కథానాయకులు రామ్‌చరణ్‌, ఎన్టీఆర్‌, కథానాయిక అలియా భట్ మాత్రమే కనిపించారు. ఈ కొత్త వీడియోలో దర్శకుడు రాజమౌళి, అజయ్‌దేవ్‌గణ్‌, ఒలివియా మోరిస్‌ తళుక్కున మెరిశారు. ఇక చివరిలో ఎన్టీఆర్‌, చరణ్‌, అలియాలతో కలిసి జక్కన్న కూడా స్టెప్పులు వేయడం ఈ పాట విశేషం.

నిర్మాత దానయ్య రూ.400 కోట్ల బడ్జెట్ తో ఈ సినిమాను నిర్మించారు. ఈ సినిమాకి ఎం.ఎం. కీరవాణి సంగీతం అందించారు. కె.కె. సెంథిల్ కుమార్ సినిమాటోగ్రఫీ అందించారు.