ఆర్‌ఆర్‌ఆర్‌: ‘కొమురం భీముడో’ వీడియో సాంగ్‌ రిలీజ్‌..!

దర్శకధీరుడు రాజమౌళి తెరకెక్కించిన ఆర్ఆర్ఆర్ ప్రభంజనం ఇంకా కొనసాగుతూనే ఉంది.. ఇప్పటివరకు ప్రపంచవ్యాప్తంగా రూ. 1300 కోట్లకు పైగా వసూళ్లు సాధించి ఆల్ టైమ్ రికార్డ్ క్రియేట్ చేసింది. రామ్ చరణ్, ఎన్టీఆర్ నటనకు కేవలం తెలుగు ప్రేక్షకులే కాకుండా.. దేశ వ్యాప్తంగా సినీ ప్రియులు ముగ్దులయ్యారు. ఇక మరోవైపు ఈ మూవీలోని ప్రతి సాంగ్ యూట్యూబ్‌ను షేక్ చేస్తున్నాయి. నాటు నాటు, ఎత్తర జెండా, కొమ్మా ఊయ్యాల సాంగ్ నెట్టింట్లో ట్రెండ్ అవుతున్నాయి. ఇక గత కొద్ది రోజులుగా ఆర్ఆర్ఆర్ సినిమాలోని పాటల వీడియోలను యూట్యూబ్‏లో రిలీజ్ చేస్తున్న సంగతి తెలిసిందే. ఇప్పటికే నాటు నాటు సాంగ్, ఎత్తర జెండా సాంగ్ వీడియోస్ రిలీజ్ చేసిన మేకర్స్..తాజాగా కొమురం భీముడో వీడియో సాంగ్ విడుదల చేశారు.

హావభావాలకు అధిక ప్రాధాన్యమున్న ఈ గీతం అందరి హృదయాలను హత్తుకునేలా ఉంది. సుద్దాల అశోక్‌తేజ సాహిత్యం, కాలభైరవ గానం, ఎం. ఎం. కీరవాణి సంగీతానికి లిరికల్‌ వీడియో విడుదలైనప్పుడే శ్రోతల నుంచి చక్కటి ఆదరణ దక్కింది.
యంగ్‌ టైగర్‌ జూనియర్‌ ఎన్టీఆర్‌ కొమురం భీముడిగా, మెగాపవర్‌ స్టార్‌ రామ్‌చరణ్‌ అల్లూరి సీతారామరాజుగా నటించిన ఈ చిత్రానికి ఎమ్‌ఎమ్‌ కీరవాణి సంగీతం అందించాడు. ఆయనలో సంగీతం అందించిన ఒక్కో పాట ఒక్కో ఆణిముత్యంలా జనాలను హత్తుకుంది. రామరాజు చేతిలో కొమురం భీమ్‌ దెబ్బలు తినే సమయంలో వచ్చే కొమురం భీముడో పాట ప్రేక్షకుల హృదయాలను కదిలించకమానదు.

రాజమౌళి దర్శకత్వం వహించిన ఈ మూవీని డీవీవీ ఎంటర్ టైన్మెంట్స్ పతాకంపై డీవీవీ దానయ్య నిర్మించారు. ఈ సినిమాలో రామ్ చరణ్ సరసన బాలీవుడ్ బ్యూటీ అలియా భట్ నటించగా.. ఎన్టీఆర్ కు హీరోయిన్ గా హాలీవుడ్ హీరోయిన్ ఒలివియా మోరిస్ నటించారు. వీరితో పాటు అజయ్ దేవగణ్, సముద్రఖని, శ్రియ, రాహుల్ రామకృష్ణ కీలక పాత్రలు పోషించారు.