భీమ్లా నాయక్ మాస్ జాతర.. రేపే ప్రీ-రిలీజ్‌ ఈవెంట్

పవర్ స్టార్ పవన్ కల్యాణ్, రానా దగ్గుబాటి కలిసి నటించిన మల్టీస్టారర్ చిత్రం ‘భీమ్లా నాయక్’. ఫిబ్రవరి 25న ప్రపంచవ్యాప్తంగా థియేటర్లలో ఈ చిత్రం విడుదల కానుంది. సితార ఎంట‌ర్‌టైన్‌మెంట్స్ బ్యాన‌ర్‌పై సాగ‌ర్ కె.చంద్ర ద‌ర్శ‌క‌త్వంలో రూపొందిన ఈ చిత్రాన్ని సూర్య దేవ‌ర నాగ వంశీ డైరెక్ట్ చేశారు. స్టార్ డైరెక్ట‌ర్‌..రైట‌ర్ త్రివిక్ర‌మ్ ఈ సినిమాకు స్క్రీన్ ప్లే, మాట‌లు అందించారు.

తాజాగా ఈ సినిమా ట్రైలర్‌ను విడుదల చేయగా సోషల్ మీడియాలో సూపర్ రెస్పాన్స్‌తో దూసుకుపోతోంది. ఈ సినిమా ట్రైలర్ విడుదలైన రెండు గంటల్లోనే యూట్యూబ్‌లో  6 మిలియన్ పైగా వ్యూస్‌ను రాబట్టుకుంది. ఈ ట్రైలర్‌లో డ్యూటీకి పవర్‌కు మధ్య జరిగిన క్లాషెస్‌ను చూపించారు. ఇక ‘భీమ్లా నాయక్’ చిత్రానికి సెన్సార్ వాళ్లు ‘U/A’ సర్టిఫికేట్ జారీ చేశారు. ఈ సినిమా ఈ నెల 25న ఏక కాలంలో తెలుగుతో పాటు హిందీతో విడుదల కానుంది. ఈ సినిమాను హిందీలో B4U మోషన్ పిక్చర్స్ వాళ్లు రిలీజ్ చేస్తున్నారు.

ఇక ఏపీ మంత్రి మేకపాటి గౌతమ్‌రెడ్డి గుండెపోటుతో కన్నుమూసిన నేప‌థ్యంలో ఆయ‌న మృతికి సంతాపంగా నిన్న జరగాల్సిన ‘భీమ్లా నాయక్’ ప్రీ రిలీజ్ వేడుక‌ వాయిదా ప‌డిన విష‌యం తెలిసిందే. చిత్ర నిర్మాణ సంస్థ సితార ఎంటర్‌టైన్‌మెంట్ తాజాగా ప్రీ రిలీజ్ వేడు‌క‌కు సంబంధించిన కొత్త తేదీని ప్ర‌క‌టించింది. రేపు సాయంత్రం 6.30 గంట‌ల నుంచి హైద‌రాబాద్‌లోని యూస‌ఫ్ గూడ్ పోలీస్ గ్రౌండ్స్‌లో ఈ వేడుక‌ను నిర్వ‌హించ‌నున్న‌ట్లు తెలిపింది. పవర్ స్టార్ పవన్ కల్యాణ్, రానా దగ్గుబాటి నటించిన ఈ సినిమాపై భారీ అంచనాలు ఉన్నాయి.