రౌడీ హీరో విజయ్ దేవరకొండ, డాషింగ్ డైరెక్టర్ పూరి జగన్నాధ్ కాంబోలో తెరకెక్కుతోన్న సినిమా ‘లైగర్’. అనన్య పాండే హీరోయిన్‌గా నటిస్తోంది. పూరి-విజయ్ కాంబినేష్‌లో ‘లైగర్’ సినిమా అని ప్రకటించగానే ప్రేక్షకుల్లో భారీ ఆసక్తి నెలకొంది. ఇప్పటికే షూటింగ్ పూర్తయిన ఈ సినిమాను పాన్ ఇండియా లెవెల్‌లో విడుదల చేయనున్నారు. ఇటీవలే ఈ సినిమాకి సంబంధించిన టీజర్ వదలగా.. యూట్యూబ్‌లో సెన్సేషన్ అయింది. ఇక ఈరోజు (మే 9) విజయ్ దేవరకొండ పుట్టినరోజు సందర్భంగా సినిమా నుంచి ‘లైగర్ హంట్’ అనే సాంగ్ థీమ్‌ను రిలీజ్ చేశారు.
‘బతకాలంటే గెలవాల్సిందే’ అంటూ సాగే ఈ థీమ్ ఫ్యాన్స్ ను విపరీతంగా ఆకట్టుకుంటుంది. మ్యూజిక్ అయితే ఓ రేంజ్ లో ఉంది. విక్రమ్ మాన్ట్రోస్ ఈ సాంగ్ ను కంపోజ్ చేయగా.. భాస్కర్ భట్ల లిరిక్స్ అందించారు. తెలుగు వెర్షన్ ను హేమచంద్రతో పాడించారు. సాంగ్ విజువల్స్ కూడా ఆకట్టుకున్నాయి. విజయ్ చాలా అగ్రెసివ్ గా కనిపించాడు. ఆపోజిట్ ప్లేయర్‌కి మిడిల్ ఫింగర్ చూపిస్తూ కనిపించాడు. మెుత్తానికి ఈ పవర్‌ఫుల్‌ గీతం అన్ని వర్గాల వారిని అలరించేలా ఉంది.
మిక్స్‌డ్‌ మార్షల్‌ ఆర్ట్స్‌ నేపథ్యంలో రూపొందిన ఈ సినిమా కోసం విజయ్ తన శరీరాకృతిని మార్చుకున్న సంగతి తెలిసిందే. సిక్స్‌ప్యాక్‌ బాడీతోపాటు పొడవాటి జుత్తుతో సరికొత్తగా కనిపించాడు. ఈ సినిమాలో విజయ్ సరసన అనన్య పాండే సందడి చేసింది. బాక్సింగ్ దిగ్గజం మైక్ టైసన్‌ను కీలక పాత్ర కోసం తీసుకున్నారు. రమ్యకృష్ణ, రోనిత్ రాయ్ ప్రధాన పాత్రల్లో నటిస్తున్నారు. ఇక ఈ సినిమా విడుదల తేదీ ఆగస్టు 25 కోసం ప్రేక్షకులు ఆసక్తిగా ఎదురుచూస్తున్నారు.