‘బాహూబలి’ సినిమాతో పాన్‌ ఇండియా స్టార్‌గా గుర్తింపు తెచ్చుకున్న దగ్గుబాటి రానాకి దాని తర్వాత ఆ రేంజ్‌లో హిట్‌ అందుకోవడానికి చాలా కాలం పట్టింది. ఎట్టకేలకు భీమ్లానాయక్‌ రూపంలో ఆ కొరత తీర్చుకున్నాడు. ఇందులో పవన్‌కు ధీటుగా డానియల్‌ శేఖర్‌గా అదరగొట్టాడు రానా. కొన్ని సీన్లలో పవన్‌ కన్నా రానానే హైలెట్‌ అయ్యాడు.
కాగా రానా, సాయిపల్లవి కాంబినేషన్‌లో రూపొందుతోన్న ‘విరాట పర్వం’ చాలా రోజుల నుంచి షూటింగ్‌ జరుపుకుంటోంది. నక్సలిజం నేపథ్యంలో తెరకెక్కుతున్న ఈ సినిమాలో ప్రియమణి, జరీనా వహాబ్, నవీన్ చంద్ర, సాయిచంద్, నందితాదాస్, బెనర్జీ, ఈశ్వరీరావు తదితరులు కీలక పాత్రలు పోషించారు. సురేష్ బాబు, సుధాకర్ చెరుకూరి సంయుక్తంగా నిర్మించిన ఈ చిత్రానికి వేణు ఊడుగల దర్శకత్వం వహిస్తున్నారు. ‘విరాటపర్వం’ సినిమా ఓటీటీలో విడుదల అవుతుందంటూ ఆమధ్య జోరుగా ప్రచారం సాగింది. తాజాగా రానా ఈ విషయంపై క్లారిటీ ఇచ్చాడు. ఇప్పటికే విరాట పర్వం సినిమా రీ రికార్డింగ్ పూర్తయిందని… త్వరలో సినిమా ప్రివ్యూ చూడబోతున్నానని రానా చెప్పాడు. ఇప్పటికే చాలా సినిమాల విడుదల తేదీలను ప్రకటించిన నేపథ్యంలో ఓ మంచి రిలీజ్ డేట్‌ను వెతుక్కుని ‘విరాటపర్వం’ ను ప్రేక్షకుల ముందుకు తీసుకొస్తామని రానా తెలిపారు.