టాలీవుడ్‌ అగ్ర కథానాయికల్లో సమంత, పూజాహెగ్డేలు ముందు వరుసలో ఉంటారు. టాలీవుడ్‌, బాలీవుడ్‌, కోలీవుడ్‌ అనే తేడా లేకుండా అన్నింటా తన అద్భుతమైన నటన, అందచందాలతో అలరిస్తున్నారు. అయితే గతంలో వీరిద్దరి మధ్య స్వల్ప విభేదాలు తలెత్తిన విషయం అందరికీ తెలిసిందే.
పూజా తన ఇన్ స్టాగ్రామ్‌లో సమంత ఫొటోను పోస్ట్‌ చేసి ‘ఈమె ఏం బాగుందనీ’ అంటూ కామెంట్ చేసింది. అయితే, దానిపై వెంటనే స్పందించిన పూజ.. తన ఇన్ స్టాగ్రామ్ అకౌంట్ హ్యాక్ అయిందని క్లారిటీ ఇచ్చింది. ఆ పోస్ట్‌ను వెంటనే ఆమె డిలీట్‌ చేసినప్పటికీ జరగాల్సిన ట్రోలింగ్‌ జరిగిపోయింది. పోస్ట్‌ చూసిన సమంత అభిమానులు విపరీతంగా పూజాను ట్రోల్ చేశారు. ఆ తర్వాత వారి అభిమానుల మధ్య కొన్నాళ్లు వాగ్వాదం నడిచింది. అయితే వీటిపై సమంత ఏమాత్రం స్పందించలేదు. ఇక అప్పటి నుంచి ఈ ముద్దుగుమ్మలిద్దరి మధ్య మాటలు లేవని నెటిజన్లు ఓ అభిప్రాయానికి వచ్చేశారు.
పూజాహెగ్డే ఎనిమిదేళ్ల తర్వాత కోలీవుడ్‌లో సినిమా చేస్తున్నారు. విజయ్‌ కథానాయకుడిగా నటిస్తున్న ‘బీస్ట్‌’లో పూజా లీడ్‌ రోల్‌ పోషించారు. తాజాగా ఈ సినిమా నుంచి ‘అరబిక్‌ కుత్తు’ పాట విడుదలై సూపర్‌ హిట్‌ అందుకుంది. 5 కోట్ల వ్యూస్‌తో యూట్యూబ్‌లో దూసుకెళ్తోన్న ఈ పాటకు సమంత తాజాగా డ్యాన్స్‌ చేశారు. లేట్‌ నైట్‌ ప్రయాణం చేస్తోన్న ఆమె ఎయిర్‌పోర్ట్‌లో ‘అరబిక్‌ కుత్తు’కు డ్యాన్స్‌ చేసి ఆ పాట రిథమ్‌ని ఎంజాయ్‌ చేస్తున్నట్లు చెప్పారు. సాంగ్‌ సూపర్‌గా ఉందని ‘బీస్ట్‌’ టీమ్‌ని ప్రశంసించారు. కాగా, ఈ వీడియో చూసిన పూజాహెగ్డే ఎంతో ఆనందించారు. సామ్‌ డ్యాన్స్‌ వీడియోని ఇన్‌స్టా స్టోరీస్‌లో షేర్‌ చేస్తూ.. ‘‘అద్భుతం’’ అని మెచ్చుకున్నారు.