చిత్ర పరిశ్రమలో లైంగిక వేధింపుల వివాదాలు ఎప్పుడూ సంచలనమే. తాజాగా మలయాళం చిత్ర పరిశ్రమలో మరో వివాదం నెలకొంది. నివిన్‌ పౌలి, మంజు వారియర్‌, అదితి బాలన్ ప్రధాన పాత్రలుగా తెరకెక్కుతోన్న మలయాళ చిత్రం ‘పడవెట్టు’. ఆ చిత్ర దర్శకుడు లిజు కృష్ణను అత్యాచారం ఆరోపణల నేపథ్యంలో ఆదివారం కేరళలోని కన్నూర్‌లో పోలీసులు అదుపులోకి తీసుకున్నారు. సోమవారం కొచ్చిలోని మేజిస్ట్రేట్ ముందు పోలీసులు హాజరుపరిచారు. ప్రస్తుతం ఈ వివాదం మాలీవుడ్‌లో సంచలనంగా మారింది.
కృష్ణ అరెస్టును ధృవీకరించిన పోలీసులు, అతను మించి ఇతర వివరాలు వెల్లడించలేమని చెప్పారు. సోషల్‌ మీడియా ద్వారా పరిచయమైన ఓ మహిళకు తన చిత్రంలో పనిచేసే అవకాశం కల్పించిన లిజు కృష్ణ.. ఆపై ఆమెతో సహజీవనం చేయడం ప్రారంభించాడు. పెళ్లి చేసుకుంటానని నమ్మబలికి చివరికి నిరాకరించడంతో ఆమె పోలీసులకు ఫిర్యాదు చేసింది. కాకనాడ్ ఇన్ఫోపార్క్ స్టేషన్‌లో లీజుపై కేసు నమోదైంది. ఈ విషయంపై పోలీసులు మాట్లాడుతూ.. ‘‘లిజు కృష్ణను ఐపీసీ 376 సెక్షన్ కింద అరెస్టు చేశాం. ఫిర్యాదు చేసిన యువతి సినిమాకు చెందిన వ్యక్తి కాదు. ఆ యువతికి చెందిన వివరాలు గోప్యంగా ఉంచుతాం. ఆ యువతితో లిజు కృష్ణకు కొన్నాళ్లుగా పరిచయం ఉంది’’ అన్నారు.
ప్రస్తుతం కేరళలోని కన్నూరులో ఈ సినిమా షూటింగ్ జరుగుతోంది. ఈ ఏడాది పడవెట్టు సినిమా రిలీజ్ చేయాలని అనుకున్నారు. పడవెట్టు సినిమాకు లిజుకృష్ణనే కధ రాసుకున్నాడు. ఇందులో నవీన్ పాలీతోపాటు మంజువారియర్, అదితి బాలన్ ప్రధాన పాత్రల్లో నటిస్తున్నారు. గతంలో మూమెంట్ జస్ట్ బిఫోర్ డెత్ అనే సినిమాకు దర్శకత్వ వహించిన సన్నీవేన్ ఈ సినిమాను నిర్మిస్తున్నారు. కాగా… కేరళలో అత్యాచార కేసులు వెలుగు చూస్తూనే ఉన్నాయి. ఆరుగురు మహిళలపై అత్యాచారం చేశాడనే ఆరోపణలతో కొచ్చిలో శనివారం టాటూ ఆర్టిస్ట్ సుజీష్‌ను అరెస్ట్ చేశారు.