బాలీవుడ్ అగ్ర నిర్మాత, దర్శకుడు, నటుడు, హోస్ట్ అయిన కరణ్ జోహార్ అందరికీ షాక్ ఇచ్చారు. కాఫీ విత్ కరణ్ అనే షో దేశ వ్యాప్తంగా ఎంత ఫేమస్ అయిందో అందరికీ తెలిసిందే. కాఫీ విత్ కరణ్ షోలో పాల్గొనాలని సెలెబ్రిటీలు అందరూ భావిస్తుంటారు. సెలబ్రిటీలను స్టూడియోకు పిలిచి సరదా, షాకింగ్ ప్రశ్నలు వేస్తూ సరదా సరదాగా సాగిపోయే షో అది. అలాంటి సూపర్ హిట్ షో.. ఆరు సీజన్లను పూర్తి చేసుకుంది. ఇక ఏడో సీజన్ గ్రాండ్‌గా ప్రారంభం అవుతుందని అభిమానులు ఆశించారు. కానీ చివరకు కరణ్ జోహార్ అదిరిపోయే ట్విస్ట్ ఇచ్చాడు.
కాగా, గత కొన్నిరోజుల నుంచి ‘కాఫీ విత్ కరణ్ – సీజన్ 7’ రానుందంటూ వార్తలు వస్తున్నాయి. ఈ నేపథ్యంలో ఆయా వార్తలపై తాజాగా కరణ్ స్పందించారు. ‘‘గడిచిన ఆరు సీజన్ల నుంచి ‘కాఫీ విత్ కరణ్’ నా, మీ జీవితాల్లో భాగమైపోయింది. ఈ షో వేదికగా మేము ఒక సరికొత్త ప్రభావం కలిగించిందనందుకు ఆనందంగా ఉంది. అలాంటి ‘కాఫీ విత్ కరణ్’ తిరిగి ప్రసారం కావడం లేదు. బరువైన హృదయంతో ఈ మాట చెబుతున్నా’’ అని కరణ్ తెలిపారు. అయితే కరణ్ జోహార్ ఇలా ప్రకటన చేయడంతో అభిమానులు హర్ట్ అవుతున్నారు. ఇకపై సెలెబ్రిటీల పర్సనల్ విషయాలను ఎవరు అలా సున్నితంగా అడుగుతారు.. ఎవరు బయటకు తీసుకొస్తారంటూ ట్వీట్లు పెడుతున్నారు. మంచు లక్ష్మీ సైతం స్పందించింది. గుండె బద్దలైందన్నట్టుగా హార్ట్ ఎమోజీని షేర్ చేసింది.
కాగా ‘కాఫీ విత్ కరణ్’ టాక్ షో మొదటి సీజన్ 2004లో మొదలైంది.. ఈ షోకి షారుఖ్ ఖాన్ , కాజోల్ ఫస్ట్ గెస్ట్ లుగా వచ్చారు.. సుమారు 15 సంవత్సరాల పాటు నడిచిన ఈ షోకి సల్మాన్ ఖాన్, కరీనా కపూర్, కరిష్మా కపూర్, సోనమ్ కపూర్, అమీర్ ఖాన్, అమితాబ్ బచ్చన్, దీపికా పదుకొనే, ట్వింకిల్ ఖన్నా, రాణి ముఖర్జీ, హృతిక్ రోషన్, సైఫ్ అలీ ఖాన్, సంజయ్ దత్, ఏక్తా కపూర్జాన్ అబ్రహం, లారా దత్తా వంటి ఎంతోమంది ప్రముఖులు అతిథులుగా వచ్చారు. ఈ షో చివరి సీజన్ 2019లో ప్రసారం అయింది.