కొత్త కొత్త వంటలు, కొత్త రుచులు ప్రయత్నించడంలో తప్పే లేదు. కానీ అతి ప్రయోగాలు ఎప్పుడూ బెడిసికొడతాయి. ఈమధ్య సోషల్ మీడియాలో సరికొత్త వంటల ప్రయోగాలను చూస్తున్నాం. ప్రయోగాల పేరుతో ఉన్న ఆహారాన్ని చెడగొట్టి భయంకరమైనవి చేస్తున్నారనే విమర్శలు వస్తున్నాయి. తాజాగా బెంగళూరులో ఐస్‌క్రీమ్ పానీపూరీ వచ్చింది. ఐస్‌క్రీమ్‌లో పానీపూరీని ఉంచి డెలివరీ చేస్తున్నారు. పానీపూరీని ఎవరైనా హాట్‌గా, స్పైసీగా తినాలని అనుకుంటారు. అందులో వేసే రసం, ఉల్లిపాయలు, బఠాణీల కర్రీ అన్నీ స్పైసీవే. అలాంటి పానీపూరీని పూర్తిగా ఐస్‌క్రీమ్‌లో ముంచి అమ్ముతున్నారు. ఐస్‌క్రీమ్‌లో ఆ పానీపూరీ గట్టిపడుతోంది. దాన్ని తింటే ఎలా ఉంటుందో ఫుడ్ బ్లాగర్ అంజలి థింగ్రా… ఇన్‌స్టాగ్రామ్‌లోని తన అకౌంట్ @sooosaute లో చూపించారు.
బెంగళూరులోని డాక్ ఫ్రోస్టెడ్ అనే రెస్టారెంట్ నుంచి ఈ ఐస్‌క్రీమ్ పానీపూరీని ఆమె ఆర్డర్ చేశారు. డెలివరీ వచ్చాక… ఆ పార్శిల్‌ని ఓపెన్ చేస్తూ వీడియో రికార్డ్ చేశారు. అందులో ఓ ఐస్‌క్రీమ్ బాక్స్ ఉంది. దాన్ని ఓపెన్ చేశారు. అందులో ఐస్‌క్రీమ్‌పై గడ్డకట్టిన పానీపూరీ ఒకటి ఉంది. దాన్ని తిన్న ఆమె… చాలా బాగుందనీ.. టేస్ట్ అదిరిందని చెప్పారు. ఈ వీడియోని ఆమె డిసెంబర్ 11న పోస్ట్ చెయ్యగా… ఇప్పటివరకు 12వేల మంది లైక్ చేశారు. నెటిజన్లకు మాత్రం ఇది నచ్చలేదు. ఫుడ్ బ్లాగర్లలో చాలా మంది సరికొత్త ఆహారాన్ని పరిచయం చేస్తూ… అది ఎలా ఉన్నా… బాగుందనీ, టేస్ట్ సూపర్ అని చెబుతుంటారు. ప్రస్తుతం ఈ వీడియో సోషల్ మీడియా లో వైరల్ గా మారింది.