సోనూసూద్.. పెద్దగ పరిచయం అక్కర్లేని పేరు. సినిమాలో విలన్‌గా కంటే నిజ జీవితంలో రియల్‌ హీరోగానే అందరికి తెలుసు. కరోనా సమయంలో ఎందరో అభాగ్యులకు ఆపన్న హస్తం అందించారు. తన సొంత ఖర్చులతో ఎంతోమంది వలస కూలీలను వారి సొంత రాష్ట్రాలకు చేర్చారు. అప్పటి నుంచి ఎవరూ ఏ సాయం అడిగినా కాదనకుండ తనవంతుగా చేయూతనిస్తూ వస్తున్నారు. ఓ ఫౌండేషన్‌ పెట్టి అనారోగ్యులకు వైద్య ఖర్చులు, పెద పిల్లలకు చదువు.. ఇలా రకరకాల సామాజిక సేవలు అందిస్తున్నారు. దీంతో సోనూ సూద్ అందరికి రియల్‌ హీరో అయ్యారు.
ఓవైపు తన సహాయ కార్యక్రమాలు కొనసాగిస్తూనే.. మరోవైపు సినిమాల్లో కూడా బిజీగా ఉన్నారు సోను. తాజాగా ఆయన ఆచార్య సినిమాలో విలన్ పాత్రలో నటించారు. చిరంజీవి, చరణ్ కలిసి నటించిన ఆచార్య ఏప్రిల్ 29న ప్రపంచవ్యాప్తంగా రిలీజ్ అయింది. తండ్రి కొడుకులని స్క్రీన్ మీద ఒకే సారి చూసి మెగా అభిమానులు, ప్రేక్షకులు ఆనందం వ్యక్తం చేస్తున్నారు. ఇందులో సోనూసూద్ విలన్‌గా చేశారు. ఇక సినిమా విడుదల అంటే అభిమానులు చేసే హంగామా మామూలుగా ఉండదు. స్టార్ హీరోల ఫ్యాన్స్ థియేటర్ల దగ్గర కటౌట్స్ కడతారు. పాలాభిషేకం చేస్తారు. ‘ఆచార్య’ విడుదల అయిన పలు థియేటర్ల దగ్గర చిరంజీవి, రామ్ చరణ్ కటౌట్స్ కట్టారు ఫ్యాన్స్. అయితే, ఓ థియేటర్ దగ్గర ‘ఆచార్య’లో విలన్ రోల్ చేసిన సోనూ సూద్ కటౌట్ పెట్టారు కొందరు. ఆయనకు పాలాభిషేకం చేశారు. హైదరాబాద్‌లోని శాంతి థియేటర్ వద్ద సోనూసూద్‌కి భారీ కటౌట్ ఏర్పాటు చేశారు ఆయన అభిమానులు. డప్పులతో డాన్సులు చేస్తూ… థియేటర్ వద్ద హల్ చల్ చేశారు. సోనూసూద్ కటౌట్‌కి పాలాభిషేకం చేశారు. ఈ కటౌట్‌కి పెద్ద దండ వేసి, బొట్టు పెట్టి గుమ్మడికాయతో దిష్టి తీశారు అభిమానులు. దీనికి సంబంధించిన వీడియో ఇప్పుడు సోషల్ మీడియాలో వైరల్ అవుతుంది.
The #SonuSood Phenomenon continues as the fans pour their love on the real hero once again! Such feat is rarely achieved by few super stars! @SonuSood pic.twitter.com/1hNurkpZR7
— Harish Kumar (@apparalaharishk) April 30, 2022
మరోవైపు ఆచార్య సినిమాని దాదాపు 100 కోట్లకు పైగా బడ్జెట్‌తో నిర్మించారు. ఈ సినిమా 135 కోట్ల ప్రీ రిలీజ్ బిజినెస్ చేసింది. తెలుగు రాష్ట్రాల్లో ‘ఆచార్య’ తొలి రోజున రూ.29.59 కోట్ల షేర్ కలెక్ట్ చేసింది. కేవలం తెలుగులోనే అన్ని చోట్ల ఆచార్యని విడుదల చేశారు. వీకెండ్ మరో రెండు రోజులు ఉండటం, వారం రోజులు వరకు మరే సినిమా లేకపోవడంతో ఆచార్యకి ఈజీగా బ్రేక్ ఈవెన్ కలెక్షన్స్ వస్తాయని అంచనా వేస్తున్నారు.