మెగాస్టార్ చిరంజీవి ప్రధాన పాత్రలో మాస్ డైరెక్టర్ కొరటాల శివ తెరకెక్కిస్తున్నచిత్రం ‘ ఆచార్య’. ఏప్రిల్ 29వ తేదీన ఈ సినిమాను విడుదల చేయనున్నట్లు ఇటీవలే ప్రకటించారు. మెుదట తెలుగులో మాత్రమే విడుదల చేయాలనుకున్న ఈ సినిమాను ఇప్పుడు హిందీలో కూడా రిలీజ్ చేయడానికి సన్నాహాలు చేస్తున్నారట. బాలీవుడ్‌లో భారీస్థాయిలో రిలీజ్ చేయాలని నిర్ణయించుకున్నారని సమాచారం.
తాజా సమాచారం ప్రకారం ఈ చిత్రం హిందీలోనూ డబ్‌ చేసి విడుదల చేయబోతున్నారట. ఇదే విషయాన్ని హిందీలో పంపిణీ చేయనున్న ‘పెన్‌ స్టూడియోస్‌’ సంస్థ తెలిపింది. ఈ సంస్థ నుంచి పలు సినిమాలు రిలీజ్‌కు రెడీ అవుతున్నాయి. రవితేజ నటించిన ‘ఖిలాడి’ చిత్రాన్ని కూడా డబ్‌ చేసి ‘పెన్‌ స్టూడియోస్‌’ హిందీలో రిలీజ్ చేసింది. ఇక వీటితో పాటు వారి స్ట్రయిట్‌ బాలీవుడ్‌ సినిమా ‘గంగూభాయి కతియావాడి’, ‘ఆర్ఆర్ఆర్’, జెర్సీ హిందీ రిమేక్‌ ‘అటాక్‌ పార్ట్‌ 1’ వంటి చిత్రాలు పెన్‌ స్టూడియోస్‌ నుంచి వరుసగా ప్రేక్షకుల ముందుకు రానున్నాయి. అలానే ‘ఆచార్య’ హిందీ వర్షెన్‌ను కూడా ఏప్రిల్ 29న విడుదల చేయబోతున్నట్టు ఆ సంస్థ పేర్కొంది. దీంతో మెగాభిమానులు సంబరాలు చేసుకుంటున్నారు.
ఆచార్య సినిమాలో చిరు సరసన కాజల్ హీరోయిన్గా నటించగా.. రామ్ చరణ్, పూజా హెగ్డే కీలకపాత్రలలో నటించారు. అవినీతి పరులైన భూస్వాముల పెత్తందారీతననానికి వ్యతిరేకంగా పోరాడే నక్సలైట్ల పాత్రల్లో చిరంజీవి, చరణ్ కనిపించనున్నారు. ఈ సినిమాకి మణిశర్మ సంగీతాన్ని అందించారు. సోనూ సూద్, సంగీత, పోసాని, వెన్నెల కిశోర్ ముఖ్యమైన పాత్రలను పోషించిన ఈ సినిమాకి, రెజీనా ఐటమ్ సాంగ్ ప్రత్యేక ఆకర్షణగా నిలవనుంది.